ಕಣ್ಣಿನೊಳಗೆ ನೋಡೊ ಹರಿಯ -

ಕಣ್ಣಿನೊಳಗೆ ನೋಡೊ ಹರಿಯ - ಒಳ -

ಗಣ್ಣಿನಿಂದಲಿ ನೋಡೊ ಮೂಜಗದೊಡೆಯ ಪ.

ಆಧಾರ ಮೊದಲಾದ ಆರು - ಚಕ್ರ

ಶೋಧಿಸಿ ಸುಡಬೇಕು ಈ ಕ್ಷಣ ಮೂರು ||

ಸಾಧಿಸಿ ಸುಷಮ್ನ ಏರು ಅಲ್ಲಿ

ಭೇದಿಸಿ ನೀ ಪರಬ್ರಹ್ಮನ ಸೇರು 1

ಎವೆಹಾಕದೆ ಮೇಲೆ ನೋಡು - ಮುಂದೆ

ತವಕದಿಂದಲಿ ವಾಯು ಬಂಧನ ಮಾಡು ||

ಸವಿದು ನಾದವ ಪಾನ ಮಾಡು - ಅಲ್ಲಿ

ನವವಿಧ ಭಕ್ತಿಯಲಿ ನಲಿನಲಿದಾಡು 2

ಅಂಡದೊಳಗೆ ಆಡುತಾನೆ - ಭಾನು -

ಮಂಡಲ ನಾರಾಯಣನೆಂಬುವನೆ ||

ಕುಂಡಲಿ ತುದಿಯೊಳಿದ್ದಾನೆ - ಶ್ರೀ ಪು -

ರಂದರ ವಿಠಲನು ಪಾಲಿಸುತಾನೆ 3