ಏಕೆ ಮೈ ಮರೆದೆ ನೀನು - ಜೀವನವೇ

ಏಕೆ ಮೈ ಮರೆದೆ ನೀನು - ಜೀವನವೇ - |

ಏಕೆ ಮೈಮರೆದೆ ನೀನು ಪ

ಏಕೆ ಮೈಮರೆದೆ ನೀ - ಲೋಕಾರಾಧ್ಯನ ಪಾದ|

ಬೇಕೆಂದು ಭಜಿಸು ಕಾಣೋ - ಜೀವನವೇ ಅ.ಪ.

ಮದ್ದಾನೆಗಳೆಂಟು ಸೊಕ್ಕಿನಿಂ ಬರುವಾಗ |

ಎದ್ದು ಕುಳ್ಳಿರಬಾರದೆ - ಜೀವನವೇ ||

ಅಧ್ಯಾತ್ಮಕಾ ಹರಿನಾಮವ ಶ್ರುತಿಮಾಡಿ |

ಒದ್ದು ಬಿಸಾಡು ಕಣೊ - ಜೀವನವೇ 1

ಕಂದರ್ಪನೆಂಬವ ಕಾದುತ ಬರುವಾಗ |

ನಿಂದಿಸುತಿರಬಾರದೆ - ಜೀವನವೇ ||

ಒಂದೇ ಮನಸು ಎಂಬ ವಜ್ರಾಯುಧವ ಪಿಡಿದು |

ಕೊಂದು ಬೀಸಾಡು ಕಾಣೊ - ಜೀವನವೇ 2

ವಿಷಯದಿ ಸುಖಕಾಣೆ ಪಶುಜನರೊಳು ದೇಹ |

ಹಸನುಗಳೆಯಲು ಬೇಡವೋ - ಜೀವನವೇ||

ಬಿಸಜಾಕ್ಷ ಪುರಂದರವಿಠಲನೊಲಿಯೆ ಸುಖ -|

ರಸದಿ ಲೋಲಾಡು ಕಾಣೋ - ಜೀವನವೇ 3