ಇದೀಗ ಭಕುತಿಯು ಮತ್ತಿದೀಗ idiga bhakutiya

ಇದೀಗ ಭಕುತಿಯು ಮತ್ತಿದೀಗ ಮುಕುತಿಯು ಪ.

ಮಧುದ್ವಿಷನ ಪದಕಮಲಕೆ

ಮಧುಪನಂತೆ ಎರಗುತಿಹುದು ಅಪ

ಶ್ರೀಕಾಂತ ಮೂರುತಿ ಬಾಹ್ಯಾಂತರದಿ

ಏಕಾಂತದಿ ನೆನೆದಾನಂದ ತುಳುಕಾಡಿ ||

ಮುಖ ವಿಕಾಸದಿ ತನುವ ಮರೆದು

ವಿಕಳ ಭಾವದಿ ಉಬ್ಬುಬ್ಬಿ ಕುಣಿವುದು 1

ಡಂಭವ ಸಾರುವರತ್ತತ್ತ ಜಡಿದು

ಕುಂಭಕ ರೇಚಕ ಪೂರಕವಿಡಿದು ||

ಅಂಬುಧಿಶಾಯಿ ಪದಾಂಬುಜ ವೀಕ್ಷಿಸಿ

ಬಿಂಬವ ಕಾಂಬುವ ಹಂಬಲವಿಡಿವುದು 2

ಕಂಡವರ ಕಾಲಿಗೆ ಕುಮನುಜರಿಗೆ

ಮಂಡೆಯ ಬಾಗದೆ ಪರೇಶ ಕೊಟ್ಟಷ್ಟು ||

ಉಂಡು ಸಜ್ಜನರ ಕಂಡು ಸುಖಿಸಿ ಪಾ

ಷಂಡ ಸಂಭಾಷಣೆ ಸೋಕದೆ ಬಾಳ್ವುದು 3

ತಪುತಾರ - ಕಂಬುಲಾಂಛನ ಪಿಡಿದು

ಗುಪಿತ ಮಂತ್ರಗಳೊರೆವ ಗುರುಗ -

ಳುಪದೇಶ ಕ್ರಮವ ಮೀರದೆ ಇತರ

ಕಪಟ ಬಿಟ್ಟು ನಲಿದು ಸುಖಿಪುದು 4

ಸದ್ಭಕ್ತಿ ಸದ್ಧರ್ಮ ಮಾಡುತ ನೋಡುತ

ಸದ್ವಿಷ್ಣು ಸಚ್ಛಾಸ್ತ್ರ ಹೇಳುತ ಕೇಳುತ ||

ದುಗ್ಧ ಸಮುದ್ರೇಶ ಪುರಂದರವಿಠಲಗೆ

ಇದ್ದ ಸಂಪದವ ತಪ್ಪದೆ ಒಪ್ಪಿಸುವುದು 5