ಎಂಥ ಪುಣ್ಯವೆ ನಿನ್ನದೆಂಥ entha punyave ninnadentha

ಎಂಥ ಪುಣ್ಯವೆ ನಿನ್ನದೆಂಥ ಭಾಗ್ಯವೆ ಗೋಪಿ |

ಇಂಥ ಮಗನ ಕಾಣೆವೆ ಪ

ಚಿಂತಿಸಿದರೂ ದೊರಕ ಚೆಲುವ ರಾಜಗೋಪಾಲ |

ಇಂತೀ ಮಾತುಗಳೆಲ್ಲವು - ಹುಸಿಯಲ್ಲವು ಅ.ಪ

ಸರಸಿಜನಾಭನ ಸುಮ್ಮನೆ ಕೊಂಡಾಡೆ |

ದುರಿತವೆಲ್ಲವು ಪೋಪುದೆ ||

ಸರಸದಿಂದಲಿ ಒಮ್ಮೆ ಸವಿಮಾತನಾಡಿದರೆ |

ಪರಿತೋಷ ಕೈಗೂಡುವುದೆ-ಯಶೋದೆ 1

ಊರ ಒಳಗೆ ನಿಮ್ಮ ಅಂಜಿಕೆ ನೆರೆಹೊರೆ |

ದೂರಿಕೊಂಬುವರಲ್ಲವೆ? ||

ಅರಣ್ಯದಲಿ ನಾವು ಆಡಿದ ಆಟವು |

ಆರಿಗಾದರೂ ಉಂಟೇನೆ-ಇಂದುವದನೇ? 2

ನಿನ್ನ ಮಗನ ಕರೆಯೆ ಎನ್ನ ಪ್ರಾಣದೊಡೆಯ |

ಪುಣ್ಯದ ಫಲವು ಕಾಣೆ ||

ಚೆನ್ನ ಶ್ರೀ ಪುರಂದರ ವಿಠಲರಾಯನ |

ನಿನ್ನಾಣೆ ಬಿಡಲಾರೆವೆ-ಪುಸಿಯಲ್ಲವೆ 3