ಪಾದವನು ಕ೦ಡು ಪಾವನನಾದೆನೊ paadavanu kandu paavanaadeno

ಪಾದವನು ಕ೦ಡು ಪಾವನನಾದೆನೊ
ವೇದಾರ್ಥ ತಿಳಿದ ಗುರುರಾಘವೇಂದ್ರರ            || ಪ ||

ಮನೋಭಾವವನು ಕೊಡುವ ಘನಭಕುತರಿಗೆ ಇಂದು
ದನುಜದಲ್ಲಣನಂಘ್ರಿ ಮನದಿ ಭಜಿಸಿ
ಕನಸಿನಲಿ ಕನಕರಿಸೆ ವನಜನಾಭನಪದವ
ವಿನಯದಿಂದಲಿ ತೋರಿ ಮನ ಮೋದಪಡಿಸುವರ        || ೧ ||

ಸೀತಾರಾಮರ ಪೂಜೆ ಆತುರದಲಿ ಮಾಡಿ
ನೀತ ಮಾರ್ಗದಿ ಜಾತರಹಿತನಾದ
ಆತುರವ ಪರಿಹರಿಸಿ ಶಾತಕುಂಭನಂತೆ
ಆತುಮನ ಮಾಡುವ ಅನಿಮಿತ್ತ ಬಂಧುವಿನ            || ೨ ||

ಗುರುಸುಧೀಂದ್ರರ ವರಕುಮಾರರಿವರು
ಪರಲೋಕ ಸುಖ ಕೊಡುವ ಪರಮ ಕರುಣಿ
ಧರೆಯೊಳಗೆ ಸರಿಗಾಣೆ ಜನಾರ್ಧನ ವಿಠ್ಠಲನ್ನ
ಸ್ಥಿರವಾಗಿ ಭಜಿಸುವ ಗುರುಶಿಖಾಮಣಿ ಪಾದದ್ವಯವ            || ೩ ||