ಮತದೊಳಗೆ ಒಳ್ಳೆ ಮತ matadolage olle mata

ಮತದೊಳಗೆ ಒಳ್ಳೆ ಮತ ಮಧ್ವಮತವು - ರಘು - |

ಪತಿ ಪೂಜಾವಿಧಾನಕೆ ಪಾವನ ಮತವು ಪ.

ನಾರಾಯಣನ ನಾಮ ತುಂಬಿದ ಮತವೇದ - |

ಪಾರಾಯಣಕೆ ಅನುಕೂಲ ಮತವು ||

ತಾರತಮ್ಯದಿ ಉದ್ಧರಿಸಿ ಶ್ರುತಿಗಳನೊರೆದ

ಧಾರಣಿಸುರರ ಸಂತೋಷದ ಮತವು 1

ಅಕಲಂಕ ಶ್ರೀಹರಿಗೆ ವಜ್ರಾಂಕಿತ ಮತವು |

ಸಕಲ ದೇಶಕೆ ಸನ್ಮತವಾದ ಮತವು ||

ಅಕುಟಿಲ ಶುಕ - ಸನಕಾದಿ ಮುನೀಂದ್ರರ |

ನಿಖಿಲಕ್ರಿಯ ಪದವೀವ ನಿರ್ಮಲ ಮತವು 2

ಸರಸ ಸದ್ಗುಣ ಸತ್ಯಸಾತ್ತ್ವಿಕ ಮತವಿದು |

ಗುರುಶಿಷ್ಯರಿಗೆ ಅನುಕೂಲ ಮತವು ||

ಪರಮತ ಖಂಡಿಸಿ ಪಂಡಿತರು ಪೇಳಿದ |

ಪುರಂದರವಿಠಲನ ಮತವೆ ಹನುಮನ ಮತವು 3