ಮಗನೆಂದಾಡಿಸುವಳು | ಮೊಗ ನೋಡಿ maganendu aadisuvale

ಮಗನೆಂದಾಡಿಸುವಳು | ಮೊಗ ನೋಡಿ ನಗುವಳು ಪ

ಜಗದುದ್ಧಾರನ ಮೊಗ ಮೊಗದೊಳಿರಿಸಿಕೊಂಡು ಅ.ಪ

ಕಾಲಲಂದುಗೆ ಗೆಜ್ಜೆ ತೋಳ ಮಣಿಯು ದಂಡೆ

ಫಾಲದ ಅರಳೆಲೆಯು ಕುಣಿಯೆ

ನೀಲದುಡುಗೆಯಿಟ್ಟ ಬಾಲನೆ ಬಾರೆಂದು

ಪಾಲುಣಿಸುವ ಪುಣ್ಯವೆಂತು ಪಡೆದಳಯ್ಯ 1

ಬಣ್ಣದ ಸರಗಳಿಡೆ ರನ್ನದ ನೇವಳ

ಹೊನ್ನ ಘಂಟೆಯು ಘಣ ಘಣರೆನಲು

ಪನ್ನಗ ಶಯನನೆ ಕುಣಿಯೊಮ್ಮೆ ಕುಣಿಯೆಂದು

ಕುಣಿಸಿ ನಗುವ ಪುಣ್ಯವೆಂತು ಪಡೆದಳಯ್ಯ 2

ಕುಕ್ಷಿಯೊಳೀರೇಳು ಜಗವನು ಸಲಹುವ

ರಕ್ಷಿಪರುಂಟೆ ತ್ರೈಜಗದೊಳಗೆ

ಪಕ್ಷಿವಾಹನ ನೀನು ಅಂಜಬೇಡೆನುತಲಿ

ರಕ್ಷೆಯಿಡುವ ಪುಣ್ಯವೆಂತು ಪಡೆದಳಯ್ಯ 3

ಶಂಕ ಚಕ್ರಗದಾ ಪದುಮಧಾರಕನ

ಪಂಕಜ ಮಿತ್ರ ಶತಕೋಟಿ ತೇಜನನು

ಸಂಖ್ಯೆಯಿಲ್ಲದ ಆಭರಣಗಳ ತೊಡಿಸಿ ಅ

ಲಂಕರಿಸುವ ಪುಣ್ಯವೆಂತು ಪಡೆದಳಯ್ಯ 4

ಸಾಗರಶಯನು ಭೋಗೀಶನ ಮೇಲೆ

ಯೋಗನಿದ್ದೆಯೊಳಿಪ್ಪ ದೇವನನು

ಆಗಮ ನಿಗಮಗಳರಸ ಕಾಣದ ವಸ್ತು

ತೂಗಿ ಪಾಡುವ ಪುಣ್ಯವೆಂತು ಪಡೆದಳಯ್ಯ 5

ಪನ್ನಗ ಶಯನ ಉನ್ನಂತ ಮಹಿಮನ

ಸನ್ನುತ ಭಕುತರ ಸಲಹುವನ

ಪನ್ನಗಾರಿ ವಾಹನ ದೇವರ ದೇವ

ಚೆನ್ನಕೇಶವನ ಪಡೆದಳಯ್ಯಾ *6