ಮನವ ಶೋಧಿಸಬೇಕು ನಿಚ್ಚ - ದಿನ - |
ದಿನದಿ ಮಾಡುವ ಪಾಪ ಪುಣ್ಯದ ವೆಚ್ಚ ಪ
ಧರ್ಮ ಅಧರ್ಮ ವಿಂಗಡಿಸಿ - ದು - |
ಷ್ಕರ್ಮಕೆ ಏರಿದ ಬೇರ ಕತ್ತರಿಸಿ ||
ನಿರ್ಮಲಾಚಾರದಿ ಚರಿಸಿ - ಪರ - |
ಬೊಮ್ಮ ಮೂರುತಿ ಪಾದಕಮಲವ ಭಜಿಸಿ 1
ತನುವ ದಂಡಿಸಿ ಒಮ್ಮೆ ಮಾಣೊ - ನಿನ್ನ - |
ಮನವ ಶೋಧಿಸಿ ಪರಮಾತ್ಮನ ಕಾಣೊ ||
ನೀನು ನಿನ್ನೊಳಗೆ ಜಾಣನೊ - ಮುಕುತಿ - |
ಯೇನೂ ದೂರಿಲ್ಲವೊ ಒಂದೇ ಗೇಣೊ 2
ಆತನ ಭಕ್ತರಿಗೆ ಕೇಡಿಲ್ಲ - ಅವ - |
ಪಾತಕ - ಪತಿತಸಂಗವ ಮಾಡ ಸಲ್ಲ ||
ನೀತಿವಂತರು ಕೇಳಿರೆಲ್ಲ - ನಮ -|
ಗೀತನೆ ಗತಿಯೀವ ಪುರಂದರವಿಠಲ 3
No comments:
Post a Comment