ಸುಮ್ಮನೆ ಕಾಲವ ಕಳೆವರೆ summane kalava kalevare

ಸುಮ್ಮನೆ ಕಾಲವ ಕಳೆವರೆ - ಯಮ - |

ಧರ್ಮರಾಯನ ದೂತರೆಳೆಯರೆ ಪ.

ನರಿ - ನಾಯಿ ಜನುಮವು ಬಾರದೆ - ಹಾಗೆ - |

ನರಜನ್ಮದಲಿ ಬಂದು ಸೇರದೆ ||

ಹರಿಯ ಸ್ಮರಣೆ ಮಾಡಲಾರದೆ - ಸುಮ್ಮ |

ನಿರಲು ಪಾಪದ ವಿಷವೇರದೆ 1

ಬಾಲನಾಗಿದ್ದಾಗ ಬಹುಲೀಲೆ - ಮುಂದೆ |

ಲೋಲನಾಗಿ ಬಾಳಿದ ಮೇಲೆ ||

ಮೂಳ ವೃದ್ಧಾಪ್ಯ ಬಂತಾಮೇಲೆ - ಇನ್ನು - |

ಬಾಳುವುದೆಲ್ಲ ನೂಲಮಾಲೆ 2

ಮಡದಿ - ಮಕ್ಕಳ ಕೂಡಣ ಬಾಳು - ತನ್ನ |

ಒಡಲಿಗಾಗೆ ತಾನು ಕರವಾಳು ||

ಬಿಡದೆ ಸಂಕೀರ್ತನೆ ಮಾಡೇಳು - ಮಿಕ್ಕ - |

ನುಡಿದ ನುಡಿಗಳೆಲ್ಲವು ಬೀಳು 3

ಮನೆಮನೆ ವಾರ್ತೆಯು ಸ್ಥಿರವಲ್ಲ - ಈ |

ಮನುಜರ ಮಾತೇನು ಘನವಲ್ಲ ||

ವನಜಸಂಭವಗೂ ನಿಶ್ಚಯವಿಲ್ಲ - ಮುಂದೆ |

ಹನುಮಂತ ಪಟ್ಟಕೆ ಬಹನಲ್ಲ 4

ಇಂದಿನ ಹಮ್ಮು ನಾಳೆಗೆ ಇಲ್ಲ - ಭವ |

ಬಂಧನದೊಳು ಸಿಕ್ಕಿ ನರಳಿದೆನಲ್ಲ ||

ಮುಂದನರಿತು ನಡೆದುದಿಲ್ಲ - ಮೃತ್ಯು |

ಬಂದಾಗ ಬಿಡಿಸಿಕೊಳ್ಳುವರಿಲ್ಲ 5

ಮರಣವು ಆವಾಗ ಬರುವುದೋ - ತನ್ನ |

ಶರೀರವು ಆವಾಗ ಮುರಿವುದೊ ||

ಕರಣಂಗಳೆಲ್ಲವು ಜರಿವುದೊ - ತನ್ನ |

ಗರುವದುಬ್ಬಸವೆಲ್ಲ ಮುರಿವುದೊ 6

ಮರಣಕಾಲಕೆ ಅಜಮಿಳನಾಗ - ತನ್ನ |

ತರಳನನಾರಗನೆಂದು ಕರೆದಾಗ ||

ಕರುಣದಿ ವೈಕುಂಠ ಪದವೀಗ - ನಿತ್ಯ - |

ಪುರಂದರವಿಠಲನ ನೆನೆ ಬೇಗ 7