ಎಲ್ಲಿಯ ಮಧುರಾಪುರವು | ಎಲ್ಲಿಯ ತಾ ಬಿಲ್ಲು ಹಬ್ಬ |

ಎಲ್ಲಿಯ ಮಧುರಾಪುರವು | ಎಲ್ಲಿಯ ತಾ ಬಿಲ್ಲು ಹಬ್ಬ |

ಎಲ್ಲಿಯ ಸೋದರಮಾವನೆ ಪ

ಎಲ್ಲಿಯ ಮಲ್ಲರಸಂಗ | ಖುಲ್ಲ ಕಂಸನು ನಮಗೆ |

ಎಲ್ಲಿಯ ಜನ್ಮದ ವೈರಿಯೆ-ಸಖಿಯೆ ಅ.ಪ

ವೃಂದಾವನದೊಳಗಿರುವ ವೃಕ್ಷಜಾತಿಗಳೆಲ್ಲ |

ಒಂದೊಂದು ಫಲದಿಂದಲಿ ಸಂದಣಿತವೆ ||

ಕುಂದಕುಸುಮದಲಿರುವ ಮಂದಿರದಲಿ ಚಕೋರ |

ಒಂದೊಂದು ಸುಖಭರಿತವೆ ||

ಅಂದು ಮಾಧವ ನಮ್ಮ ಹೊಂದಿ ಕರವಿಡಿದ |

ನಂದನ ಕಂದನ ಚರಿತವೆ ಸಖಿಯೆ 1

ಅಕ್ರೂರ ತಾನೆಲ್ಲ ಅಚ್ಯುತಗೆ ಎಡೆ ಮಾಡಿ |

ಆ ಕ್ರೂರನೆನಿಸಿದನೆ |

ವಕ್ರಮಾರ್ಗವ ಕೂಡಿ ವನಿತೆಯರ ಉಸಿರೆಣಿಸಿ |

ಚಕ್ರಧರನಗಲಿಸಿದನೆ ||

ಆಕ್ರಮಿಸಿ ಸುರಲೋಕ ಪಾರಿಜಾತವನಂಬು-|

ಜಾಕ್ಷಿಗೆ ತಂದಿತ್ತನೆ-ಸಖಿಯೆ 2

ನೀರ ಚೆಲ್ಲಾಟದೊಳು ನಿಲಿಸಿ ನಮ್ಮೆಲ್ಲರ |

ನಾರಿಯರಿಗೆ ಚಲ್ಲಿದನೆ ||

ಮೋರೆ ಮೋರೆ ನೋಡಿ ಅಧರಾಮೃತಗಳ |

ಸಾರಿ ಸಾರಿ ಸವಿದುಂಬನೆ ||

ದ್ವಾರಕಾಪುರವಾಸ ಪುರಂದರವಿಠಲ |

ಸೇರಿ ನಮ್ಮನು ಸಲಹುವನೆ-ಸಖಿಯೆ 3