ಕಾಳಿಯಮರ್ದನ ರಂಗಗೆ- ಹೇಳೆ

ಕಾಳಿಯಮರ್ದನ ರಂಗಗೆ- ಹೇಳೆ ಗೋಪಮ್ಮ ಬುದ್ಧಿ |

ಕೇಳಲೊಲ್ಲನು ಎನ್ನ ಮಾತನು ಪ

ದಿಟ್ಟ ನೀರೊಳು ಕಣ್ಣ ಮುಚ್ಚನೆ-ಹೋಗಿ |

ಬೆಟ್ಟಕೆ ಬೆನ್ನಾತು ನಿಂತನೆ ||

ಸಿಟ್ಟಿಲಿ ಕೋರೆದಾಡೆ ತಿಂದನೆ-ಅಹ |

ಗಟ್ಟಿ ಉಕ್ಕಿನ ಕಂಬ ಒಡೆದು ಬಂದನೆ 1

ಮೂರಡಿ ಭೂಮಿಯ ಬೇಡಿದನೆ-ನೃಪರ |

ಬೇರನಳಿಯೆ ಕೊಡಲಿ ಪಿಡಿದನೆ ||

ನಾರಮಡಿಯನುಟ್ಟು ಬಂದನೆ-ಅಹ |

ಚೋರತನದಿ ಪಾಲ್ಬೆಣ್ಣೆಯ ತಿಂದನೆ 2

ಬತ್ತಲೆ ನಾರಿಯರನಪ್ಪಿದ-ಹೋಗಿ ||

ಉತ್ತಮಾಶ್ವವನು ಹತ್ತಿದ ||

ಹತ್ತವತಾರವ ತಾಳಿದ-ನಮ್ಮ |

ಭಕ್ತವತ್ಸಲ ಸ್ವಾಮಿ ಪುರಂದರವಿಠಲನು 3