ಅವರು ನಡೆದದ್ದೆ ರಾಜಪಥ avaru nadedadde rajapatha

ಅವರು ನಡೆದದ್ದೆ ರಾಜಪಥ ನಾರಾಯಣ |

ಅವರು ನುಡಿದದ್ದೆ ವೇದಾರ್ಥ ನಾರಾಯಣ |

ಅವರು ಮಾಡಿದ್ದೆ ಮರ್ಯಾದೆ ನಾರಾಯಣ |

ಅವರು ನಿಂತಿದ್ದೆ ಕ್ಷೇತ್ರವೈ ನಾರಾಯಣ |

ಅವರು ಮಿಂದದ್ದೆ ಸುರಗಂಗೆ ನಾರಾಯಣ |

ಅವರು ರಾಜಾಧಿರಾಜರು ಅವರೆ ಕಾಣಿರೋ |

ಅವರು ರಾಜಪರಮೇಶ್ವರರು ಅವರೆ ಕಾಣಿರೋ |

ಅವರ ದಾಸ ಜಗದೇಕನಾಥ |

ಅವರು ನಮ್ಮ ಪುರಂದರ ವಿಠಲನ ಆಳುಗಳು ಕಾಣಿರೊ 1

ಮಟ್ಟ ತಾಳ

ಹಸ್ತಿನಾಪಟ್ಟಣವ ನೇಗಿಲಲೆತ್ತಿದನೊಬ್ವ |

ಅಸ್ತಮಿಸಿದ ಇನಮಂಡಲಕೆ ಉದಯವಿತ್ತನೊಬ್ಬ |

ಪೃಥ್ವಿಯ ಅಂಬಿನಲಿ ಹರಗಿದನೊಬ್ಬ |

ವಸ್ತು ಪುರಂದರವಿಠಲಾ ನೀನಿತ್ತ ಸಲುಗೆ ಎಂತೊ 2

ತ್ರಿವಿಡೆ ತಾಳ

ಅಯ್ವತ್ತು ಸಾವಿರ ಯೋಜನವು ಎತ್ತ, ಸಂಜೀವಿನಿ ಎತ್ತ |

ಲಂಕಾಪಟ್ಟಣ ತಾನೆತ್ತ,ಹನುಮ ಕಿತ್ತೆತ್ತಿ ತಾಹೋದೆತ್ತ

ಇಲ್ಲಿಂದಲ್ಲಿಗೆ ಈಡಾಡುವುದೆತ್ತ, ಹನುಮಕಿತ್ತೆತ್ತಿ ತಾಹೋದೆತ್ತ |

ಪುರಂದರವಿಠಲಾ ನಿನ್ನ ಮಹಿಮೆ ಎಂತೊ 3

ಆಟ ತಾಳ

ಸ್ವರ್ಗದ ಮುಕ್ತಿತಿಯ ಅಂಬಿನಲಿ ಇಸುವರು |

ಮಾರ್ಗಣದಿಂದೆರೆವರು ಪಾತಾಳದ ಉದಕವನು |

ನೀರ್ಗೆಯ್ಸಿ ಭೂಮಿಯ ಮೇಲಿಟ್ಟು ಮೆರೆವರು |

ಅಗ್ರಣಿ ಪುರಂದರವಿಠಲನ ಆಳುಗಳು ಕಾಣಿರೋ 4

ಏಕತಾಳ

ಭಾಗೀರಥಿಯ ನೀಂಟಿದರುಂಟೆ |

ಸಾಗರವ ಆಪೋಶನವ ಕೊಂಡವರುಂಟೆ |

ನಾಗಾಭರಣವ ಮಾಡಿದರುಂಟೆ |

ಭಾಗವತೋತ್ತಮರುತ್ತಮರಲ್ಲದೆ |

ನಾಗಾಭರಣವ ಮಾಡಿದರುಂಟೆ |

ಪುರಂದರವಿಠಲನೆ ನಿನ್ನ ಕರುಣೆವೆಂತುಟೋ 5

ಜತೆ

ಹರಿಶರಣರಿಗಿನ್ನು ಸರಿಗಾಣೆ ಜಗದೊಳು |

ಪುರಂದರವಿಠಲ ಸ್ವಾಮಿ ನೀನಿರಲಾಗಿ |