ಮಡಿ ಮಡಿದ ಮಡಿಯೆಂದು ಮುಮ್ಮಾರು madi madi mammaru

ಮಡಿ ಮಡಿದ ಮಡಿಯೆಂದು ಮುಮ್ಮಾರು ಹಾರುತಿ |

ಮಡಿಯೆಲ್ಲಿ ಬಂದಿತೊ ಬಿಕನಾಶಿ ಪ.

ಮಡಿಯು ನೀನೆ - ಮೈಲಿಗೆ ನೀನೆ - |

ಸುಡಲಿ ನಿನ್ನ ಮಡಿ ಬಿಕನಾಶಿ ಅಪ

ಎಲವು - ಚರ್ಮ - ಮಲ - ಮೂತ್ರ ಗುಂಡಿಯಲಿ |

ನಲಿಯುತ ನಿಂತೆಯಾ ಬಿಕನಾಶಿ ||

ನೆಲೆಗೊಂಡ ನವದ್ವಾರದ ಹೊಲೆಯೊಳು |

ಅಳಲುತ ನೀ ಬಿದ್ದೆ ಬಿಕನಾಶಿ 1

ಹುಟ್ಟಲು ಸೂತಕ ಸಾಯಲು ಸೂತಕ |

ನಟ್ಟುನಡುವೆ ಬಂತೆ ಬಿಕನಾಶಿ ||

ಬಿಟ್ಟು ಬಿಡದೆ ಕಾವೇರಿಯ ಮುಳುಗಲು |

ಮುಟ್ಟು ಹೋಹುದೆ ಬಿಕನಾಶಿ 2

ಚರ್ಮವು ತೊಳದರೆ ಕರ್ಮವು ಹೋಹುದೆ |

ಮರ್ಮವ ತಿಳಿಯದೆ ಬಿಕನಾಶಿ ||

ಬೊಮ್ಮನಯ್ಯ ಪುರಂದರವಿಠಲನ ಪಾಡಿ |

ನಿರ್ಮಲದಿ ಬಾಳೆಲೊ ಬಿಕನಾಶಿ 3