ವನಿತೆ ನೀ ತೋರಿಸೆ ಹನುಮನ ಬೇಗ vanite nee torise hanuman bega

ವನಿತೆ ನೀ ತೋರಿಸೆ ಹನುಮನ ಬೇಗ |

ತನು-ಮನ-ಧನವನು ನಿನಗೀವೆನೀಗ ಪ

ಆತುರದಿಂದಲಿ ಉದಧಿಹಾರಿದವನ |

ಪ್ರೀತಿಯಲಿ ರಾಮನ ಮುದ್ರೆಯಿತ್ತವನ ||

ಘಾತಕರನ್ನು ಮುರಿದಟ್ಟಿದವನ - ಸತಿ |

ಸೀತೆಯ ಪತಿ ರಘುನಾಥಗರ್ಪಿಸಿದನ 1

ಪಾಂಡುನಂದನನಿಗೆ ಅನುಜನಾಗಿಹನ |

ಪುಂಢರೀಕಾಕ್ಷನ ಚರಣಸೇವಿಪನ ||

ಪುಂಡ ಕೌರವ ಶಿರವ ಚೆಂಡನಾಡಿದವನ 2

ಎರಡು ಮೂರಾರೊಂದು ಕುಮತ ಖಂಡಿಸಿದನ |

ಭರದಿ ಮಧ್ವಮತ ಉದ್ಧರಿಸಿದನ ||

ಧರೆಯೊಳಧಿಕ ಶ್ರೀಹರಿಯ ಭಜಕನ |

ವರದ ಶ್ರೀ ಪುರಂದರ ವಿಠಲರಾಯನ 3