ನೀ ಕೊಡೆ ನಾ ಬಿಡೆ nee kode naa bide

ನೀ ಕೊಡೆ ನಾ ಬಿಡೆ ಕೇಳಯ್ಯ-ಹರಿ-|

ಗೋಕುಲ ಪತಿ ಗೋವಿಂದಯ್ಯ ಪ

ನೋಡುವೆ ನಿನ್ನನು ಪಾಡುವೆ ಗುಣಗಳ |

ಕಾಡುವೆ ಬೇಡುವೆ ನಾಡೊಳಗೆ ||

ಮೋಡಿಯ ಬಿಡು ಕೊಡು ಮೊದಲಿಗೆ ಬಡ್ಡಿಯ |

ಕಾಡೊಳು ತುರುಗಳ ಕಾಯ್ದರಸನೆ ಹರಿ 1

ಎಂಟಕ್ಷರವಿವೆ ದ್ವಯಸಾಕ್ಷಿಗಳಿವೆ |

ಗಂಟಿಗೆ ಮೋಸವೆ ದಾಸರಿಗೆ ||

ಎಂಟುಂಟೆನಿಸುವೆ ಬಂಟರ ಬಾಯಲಿ |

ತುಂಟತನವ ಬಿಡು ತುಡುಗರರಸೆ 2

ಅಪ್ಪನೆ ಅಯ್ಯನೆ ಅಮರರಿಗೊಲಿದನೆ |

ಸರ್ಪನೆ ಮೇಲೆ ಮಲಗಿಪ್ಪವನೆ |

ಒಪ್ಪಿಸಿಕೊಟ್ಟರೆ ಪುರಂದರ ವಿಠಲನೆ |

ಒಪ್ಪವ ತೋರುವೆ ಒಡೆಯನಿಗೆ 3