ಮರವನು ನುಂಗುವ ಪಕ್ಷಿ maravanu nunguva pakshi

ಮರವನು ನುಂಗುವ ಪಕ್ಷಿ ಮನೆಯೊಳಗೆ ಬಂದಿದೆ ಪ.

ಒಂಟಿ ಕೊಂಬಿನ ಪಕ್ಷಿ ಒಳಗೆ ಕರುಳಿಲ್ಲ

ಗಂಟಲು ಮೂರುಂಟು ಮೂಗು ಇಲ್ಲ

ಕುಂಟು ಮನುಜನಂತೆ ಕುಳಿತಿಹುದು ಮನೆಯೊಳಗೆ

ಎಂಟು ಹತ್ತರ ಭಕ್ಷ ಭಕ್ಷಿಸುವುದು 1

ನಡುವೆ ತಲಿಯೆಂಬುವದು ನಡು ನೆತ್ತಿಯಲಿ ಬಾಯಿ

ಕಡು ಸ್ವರಗಳಿಂದ ಗಾನ ಮಾಡ್ವದು

ಅಡವಿಯಲಿ ಹುಟ್ಟುವುದು ಅಂಗವೆರಡಾಗುವುದು

ಬಡತನ ಬಂದರೆ ಬಹಳ ರಕ್ಷಿಪುದು 2

ಕಂಜ ವದನೆಯರ ಕರದಲ್ಲಿ ನಲಿದಾಡುವುದು

ಎಂಜಲನುಣಿಸುವುದು ಮೂರ್ಜಗಕೆ

ರಂಜಿಪ ಶಿಖಾಮಣಿ ಸಿಂಹಾಸನದ ಮೇಲಿಪ್ಪ

ಸಂಜೀವ ಪಿತ ಪುರಂದರವಿಠಲನೇ ಬಲ್ಲ * 3

ಮನೆಯೊಳಗಾಡೊ ಗೋವಿಂದ maneyolagado govinda

ಮನೆಯೊಳಗಾಡೊ ಗೋವಿಂದ-ನೆರೆ-|

ಮನೆಗಳಿಗೇಕೆ ಪೋಗುವೆಯೊ ಮುಕುಂದ ಪ

ನೊಸಲಿಗೆ ತಿಲಕವನಿಡುವೆ-ಅಚ್ಚ-|

ಹೊಸಬೆಣೆಯಿಕ್ಕಿ ಕಜ್ಜಾಯವ ಕೊಡುವೆ ||

ಹಸನಾಧಾಭರಣಗಳಿಡುವೆ-ಚಿಕ್ಕ-|

ಹಸುಳೆ ನಿನ್ನನು ನೋಡಿ ಸಂತೋಷಪಡುವೆ 1

ಅಣ್ಣಯ್ಯ ಬಲರಾಮಸಹಿತ-ನೀ-|

ನಿನ್ನೆಲ್ಲಿಯಾದರೂ ಆಡುವುದು ವಿಹಿತ ||

ಹೆಣ್ಣುಗಳೇಕೋ ಸಂಗಾತ-ರಂಗ |

ಬಿನ್ನಪ ಪರಿಪಾಲಿಸೊ ಜಗನ್ನಾಥ 2

ಜಾರನೆನಿಸಿಕೊಳಲೇಕೆ-ರಂಗ-|

ಚೋರನೆನಿಸಿಕೊಂಬ ದೂರು ನಿನಗೇಕೆ ||

ವಾರಿಜಾಕ್ಷಿಯರ ಕೂಡಲೇಕೆ-ನಮ್ಮ-|

ಪುರಂದರವಿಠಲರಾಯ ಎಚ್ಚರಿಕೆ 3

ಮನುಜ ಶರೀರವಿದೇನು manuja shareervedenu

ಮನುಜ ಶರೀರವಿದೇನು ಸುಖ - ಇದ

ನೆನೆದರೆ ಘೋರವಿದೇನು ಸುಖ ? ಪ.

ಜನನ - ಮರಣ ಮಲಕೂಪದಲ್ಲಿದ್ದು

ಅನುಭವಿಸುವುದು ಇದೇನು ಸುಖ ?

ತನುವಿದ್ದಾಗಲೇ ಹೃದಯದ ಶೌಚದ

ಸ್ತನಗಳನುಂಬುವುದೇನು ಸುಖ ? 1

ದಿನವು ಹಸಿವು ತೃಷೆ ಘನ ರೋಗಂಗಳ

ಅನುಭವಿಸುವುದು ಇದೇನು ಸುಖ

ನೆನೆಯಲು ನಿತ್ಯ ನೀರ್ಗುಳ್ಳೆಯಂತಿಪ್ಪ

ತನುಮಲಭಾಂಡವಿದೇನು ಸುಖ ? 2

ಪರಿಪರಿ ವಿಧದಲಿ ಪಾಪವ ಗಳಿಸುತ

ನರಕಕೆ ಬೀಳುವುದೇನು ಸುಖ ?

ಪುರಂದರವಿಠಲನ ಮನದಿ ನೆನೆದು ಸ ದ್ಧರುಮದೊಳ್ ನಡೆದರೆ ಆಗ ಸುಖ 3

ಮನಸು ನಿನ್ನ ಮೇಲೆ manasu ninna mele

ಮನಸು ನಿನ್ನ ಮೇಲೆ ಬಹಳ-ಕಾಲ |

ಅನುಕೂಲಿಸದೊ ಗೋಪಾಲ ಪ

ನಿನ ಕೂಡೆ ಈಗ ಕೂಡುವೆನೆಂದರೆ ಮನೆ-|

ಜನರೆಲ್ಲರು ಕೂಡಲೀಸರೊ ಕೃಷ್ಣ ಅ.ಪ

ಗಂಡನೆಂಬವನು ಉದ್ದಂಡ-ಎನ್ನ |

ಕಂಡರೆ ಸೇರನು ಭಾವ ಪ್ರಚಂಡ ||

ಭಂಡೆ ಅತ್ತೆಯು ಲಂಡೆ ಅತ್ತಿಗೆ ಕೇಳೊ |

ಕಂಡರಿಬ್ಬರನು ದಂಡಿಸುವರೊ ರಂಗ 1

ನೆರೆಹೊರೆಯವರೆನ್ನನೆಲ್ಲ-ಮೈಯ |

ನೆರಳ ಕಂಡರೆ ಸೇರರಲ್ಲ ||

ಸರಿಸಖಿಯರು ಎಲ್ಲ ಸುಮ್ಮನಿರುವರಲ್ಲ |

ಮರೆಮಾತನಾಡಲು ವೇಳೆ ಕೂಡದೊ ರಂಗ 2

ಮದುವೆ ಮಾಡುವರೊ ಮನೆಯೊಳು-ನಾಳೆ |

ಅದರ ಸಂದಣಿಯ ಹೊಂಚಿನೊಳು ||

ಮುದದಿಂದ ಕೂಡುವೆನಾವ ಪರಿಯೊಳು |

ಮದನ ತಂತ್ರದಿಂದ ಪುರಂದರವಿಠಲ 3

ಮನಸಿಟ್ಟು ಭ್ರಮಿಸುವರೇನೆ manasittu bhramisuvarenu

ಮನಸಿಟ್ಟು ಭ್ರಮಿಸುವರೇನೆ - ಘನ - |

ಗುಣವಂತನೇನವ ಜಾಣೆ ? ಪ

ಅನುದಿನ ಗೊಲ್ಲಪಳ್ಳಿಗೆ ಕಳ್ಳನೆನಿಸಿದ |

ದನಗಾಹಿ ನಿನಗೇನ ಮರುಳು ಮಾಡಿದನೆ ? ಅ.ಪ

ಜಲವಾಸಿ ಮುಖವೊಳಸೆಳೆವ - ಇವ |

ನೆಲವ ಕೆದರಿ ಕಂಬದಿ ಬಾಯ್ ತೆಗೆವ ||

ಇಳೆಯನಳೆದ ಕೊರಳಗೊಯ್ಕ ವನವಾಸಿಯ |

ಕೊಳಲಪಿಡಿದ ಕುರುಬಲವನಳಿದಾತಗೆ 1

ಅಂದು ಮಧುರೆಯಲಿ ಪುಟ್ಟಿದನ - ಆ |

ನಂದಗೋಪ - ಯಶೋದೆ ಕೋಮಲನ ||

ಕಂದನಾಗಿ ಮೊಲೆಯುಂಡು ಪೂತನಿಯನು |

ಕೊಂದು ಕಂಸರ ಪುರ ತಂದೆಗಿತ್ತವಗೆ 2

ಬತ್ತಲಿರುವ ಶ್ರೀನಿರ್ವಾಣಿ - ತೇಜಿ - |

ಹತ್ತಿ ಪಿಡಿದ ಖಡ್ಗ ಪಾಣಿ ||

ಮತ್ತರನೆಲ್ಲರ ಮರ್ದಿಸಿ ಬಲವಂತ |

ಪಾರ್ಥಗೊಲಿದ ಶ್ರೀ ಪುರಂದರವಿಠಲಗೆ 3

ಮನವೆನ್ನ ಮಾತ ಕೇಳದು manavenna maatu keladu

ಮನವೆನ್ನ ಮಾತ ಕೇಳದು - ಮಂದe್ಞÁನದಿ |

ತನುವಿನಾಸೆಯ ಬಿಡಲೊಲ್ಲದು ಪ

ವನಜನಾಭನೆ ನಿನ್ನ ನಾಮ ಸಾಸಿರವ |

ನೆನೆಯದೆ ಕಂಡಕಡೆಗೆ ಎರಗುತಲಿದೆ ಅ.ಪ

ದೇಹ ಸಂಬಂಧಿಗಳಾದವರೈವರು |

ಮೋಹಪಾಶದಿ ಕಟ್ಟಿ ಬಿಗಿದಿಹರೈ ||

ಕಾಯ ಅನಿತ್ಯವೆಂಬುದನರಿಯದೆ |

ಮಾಯಾ ಪ್ರಪಂಚದಿಂದಲಿ ಬದ್ಧನಾಗಿಹೆ 1

ಸಾಧುಸಜ್ಜನರ ಸಂಗವ ಮಾಡಿ ಪರಗತಿ-|

ಗಾಧಾರವನು ಮಾಡಲೊಲ್ಲದಯ್ಯ ||

ಕ್ರೋಧ ಕುಹಕ ದುಷ್ಟರೊಡನಾಡಿ ಕಾಲನ |

ಬಾಧೆಗೆ ಒಳಗಾಗುವಂತೆ ಮಾಡುತಲಿದೆ 2

ಮದಗಜ ಮೈಯ ಮರೆತು ಮುಂದುಗಾಣದೆ |

ಕದುವಿನೊಳಗೆ ಬಿದ್ದಂತಾದೆನಯ್ಯ ||

ಹೃದಯ ಕಮಲದಲಿ ನಿಂತ ರಕ್ಷಿಸೋ ಎನ್ನ |

ಪದುಮಾಕ್ಷ ವರದ ಶ್ರೀ ಪುರಂದರ ವಿಠಲ 3

ಮನವೆ ಚಂಚಲ ಮತಿಯ ಬಿಡು manava chanchala matiya

ಮನವೆ ಚಂಚಲ ಮತಿಯ ಬಿಡು - ನಮ್ಮ |

ವನಜನಾಭನ ಪಾದಭಜನೆಯ ಮಾಡು ಪ.

ಬಡಮನುಜಗೆ ಬಾಯಬಿಡುವ ದೈನ್ಯದಲವನ |

ಅಡಿಗಳಿಗೆರಗಲು ಕೊಡುವನೇನೊ ||

ಕಡಲಶಯನ ಜಗದೊಡೆಯನ ನೆನೆಯಕ್ಕೆ - |

ಪಿಡಿದು ತಾ ಸಲಹುವ ಬಿಡದಲೆ ಅನುಗಾಲ 1

ಬಲ್ಲಿದ ಭಕುತರ ಬಲ್ಲವ ಬಹುಸಿರಿ |

ಯುಳ್ಳ ಕರುಣಿ ಲಕ್ಷ್ಮೀನಲ್ಲನಿರೆ ||

ಕ್ಷುಲ್ಲಕರನು ಕಾಯಸಲ್ಲದೆಂದೆಂದಿಗು

ನಿಲ್ಲು ಹರಿಯ ಪಾದದಲ್ಲಿ ತಲ್ಲಣಿಸದೆ 2

ಮುಗಿಲು ಮೇಲದೆಗಡೆ ಅಗಣಿತವಾದಾಪ - |

ತ್ತುಗಳು ಬಂದಡರಲು ನಗುತಲಿರು ||

ಜಗದಧೀಶನ ಮಹಿಮೆಗೆ ನಮೋ ನಮೋ ಎಂದು |

ಪೊಗಳುತ ಬಾಳು ನೀ ಅಘಗಳ ಗಣಿಸದೆ 3

ಆವಾವ ಕಾಲಕೆ ದೇವನಿಚ್ಛೆಯಿಂದ |

ಆವಾವುದು ಬರೆ ನಿಜಸುಖವೆನ್ನು ||

ಶ್ರೀವರ ಅನಾದಿಜೀವರ ಕ್ಲಪ್ತದಂತೆ |

ಈವನು ನಿಜಸ್ವಭಾವ ಬಿಡದೆ ನಿತ್ಯ 4

ಕೇಶವಾಚ್ಯುತ ಶ್ರೀನಿವಾಸ ಮುರಾರೇ |

ದೋಷರಹಿತ ದೀನ ಪೋಷಕನೆನ್ನು ||

ಮೋಸಗೊಳಿಪ ಭವಪಾಶವ ಖಂಡಿಪ |

ಶ್ರೀಶ ಪುರಂದರವಿಠಲನು ಜಗಕಿರೆ 5