ನಾಚಿಕೆಪಡಬೇಡ - ಮನದೊಳು naachike padabeda

ನಾಚಿಕೆಪಡಬೇಡ - ಮನದೊಳು -

ಯೋಚಿಸಿ ಕೆಡಬೇಡ ಪ.

ನಿಚ್ಚ ನೆನೆಯೊ ನಮ್ಮಚ್ಯುತನಾಮವ |

ಮೆಚ್ಚಿ ಕೊಟ್ಟರೆ - ಅಚ್ಯುತ ಪದವೀವ ಅಪ

ಹರಿಹರಿಯೆಂದೊದರೋ - ಹತ್ತಿದ - |

ದುರಿತಗಳಿಗೆ ಬೆದರೋ ||

ವಾರಿಜಾಕ್ಷನ - ವೈಕುಂಠಪುರವ |

ಸೇರಿಸೇರಿ ನೀ ಕುಣಿಕುಣಿದಾಡೊ 1

ಆರಗೊಡವೆ ಏನೋ - ನರಕದ |

ದಾರಿ ತಪ್ಪಿಸುವರೆ ||

ನೀರಜಾಕ್ಷ ನಮ್ಮ ನಿರ್ಜರ ಪತಿಯಲಿ |

ಸೇರಿ - ಸೇರಿಸಿ ಮನ ನಲಿನಲಿದಾಡೊ 2

ಭಕ್ತಜನರ ಕೂಡೊ - ಭವಭಯ |

ಬತ್ತಿಪೋಪುದು ನೋಡೊ ||

ಮುಕ್ತಿದಾಯಕ ಶ್ರೀ ಪುರಂದರವಿಠಲನ |

ಭಕ್ತಿಯಿಂದ ನೀ ಹಾಡಿ ಕೊಂಡಾಡೊ 3