ಮಣಿ ಮೌಳಿ ಮೊಲ್ಲೆ mani malli molle

ಮಣಿ ಮೌಳಿ ಮೊಲ್ಲೆ ಮಲ್ಲಿಗೆಯ ದಂಡೆ

ಪಿಂಛೆದೊಂಗಲ ಉತ್ತಮಾಂಗ |

ಮೆರೆವ ಕರ್ಣಕುಂಡಲ ಕೌಸ್ತುಭ ಕಮಲಮಾಲೆ ಕಂಬುಕಂಠ |

ಸಿರಿಗಂಧ ಸಿರಿವತ್ಸ ಸಿರಿತುಲಸಿ ಸಿರಿವಕ್ಷ ಸ್ಥಳ |

ಮರಕತಮಣಿಯ ಕಡಗ ಕಂಕಣ

ಕಡೆಯ ತೊಡೆಯ ಸಮಚರಣ |

ಹೇಮವಸನ ಶ್ಯಾಮಲ ಕೋಮಲಾಂಗ |

ಅಹೋ ಗೋಪಿಯರ ಮೋಹಿಸುತಿದೆ (ಕೃಷ್ಣ)

ಅಹೋ ಜಗಜ್ಜನರÀ ಪಾಲಿಸುತಿದೆ |

ಅಹೋ ಪುರಂದರವಿಠಲನ ಬಾಲಲೀಲೆ 1

ಮಟ್ಟತಾಳ

ಪೊಂಬಟ್ಟೆಯ ಮೇಲೆ ಕಾಂಚೀದಾಮದ

ಒಲ್ಲಿಯ ಉಡಿಸುತ್ತಿ |

ಜಂಬು-(ನೀಲ) ಚೂತಗಳ ಎಳದಳಿರಮುಕುಟದ

ಮೇಲೆಸುತ್ತಿಕೊಂಡು |

ಕೊಂಬು ಕೊಳಲು ತುತ್ತುರಿ-ಮೌರಿಯಗಳು |

ಭಂವ್ ಭಂವ್ ಭಂವ್ ಝಂ ಝಂ ಝಮ್ಮೆಂಬ |

ರಾಮಕೃಷ್ಣ ಗೋವಳರ ಸಂಭ್ರವವು ಸುರರನೊಲಿಸಿತು |

ಜಂಭಭೇದಿ ಶಂಭು ಅಂಬುಜಸಂಭವನುತ |

ಕಂಬುಗ್ರೀವ ತಿರುವಿಂಗಳಪ್ಪ ಪುರಂದರವಿಠಲ 2

ತ್ರಿವಿಡೆತಾಳ

ಜಯ ಜಯ ಶ್ರೀನರಸಿಂಹ ಮಹಾಭಯ ನಿವಾರಣ |

ಜಯ ಜಯ ಶ್ರೀ ದಿವ್ಯಸಿಂಹ ಘೋರದ(ದುರಿತ) ನಿವಾರಣ |

ಪ್ರಹ್ಲಾದವರದ ಶ್ರೀ ಪುರಂದರವಿಠಲರಾಯ 3

ಅಟತಾಳ

ಅಹಂಕಾರ ಮಮಕಾರವಳಿಯದೆ ವಿಹಂಗಗಮನನು |

ಸಿಲುಕುವನೆ ಮರುಳೆ |

ಕಾಮ ಕ್ರೋಧವಬಿಡದನ್ನಕ್ಕ ಪರಬೊಮ್ಮನೊಲುಮೆ-

ಯೆತ್ತ ನೀನೆತ್ತ ಮರುಳೆ |

ಆ ಹರಿದಾಸ ಚರಣಾಬ್ಜಕೆ ಎರಗದೆ ಪುರಂದರವಿಠಲನು

ಸುಲಭನೆ ಮರುಳೆ? | 4

ಆದಿತಾಳ

ವಾಮನ ವಾಸುದೇವ ಪದ್ಮನಾಭ ಹರೆ |

ದಾಮೋದರ ಪ್ರದ್ಯಮ್ನ ಸಂಕರ್ಷಣ ವಾಸುದೇವ |

ಅನಿರುದ್ಧ ಪುರಂದರವಿಠಲರಾಯ ಪುರೋಷತ್ತಮ ಹರೆ 5

ಜತೆ

ಮನೋವಚನಗಳಲ್ಲಿ ಕಾಯಕರ್ಮಗಳಲ್ಲಿ |

ಕೊಲ್ಲೊ ಕಾಯೊ ನಂಬಿದೆ ಪುರಂದರವಿಠಲ ||