ಅಂಗುಟ ಮಾತುರವೆಂಬ anguta maaturavemba

ಅಂಗುಟ ಮಾತುರವೆಂಬ ಮೂರುತಿ ಪರೀಕ್ಷಿಸಿತು |

ಕಂಡು ಕಂಡರÀಸಿಕೊಂಬ ಕಮನೀಯ ಮೂರುತಿಯು |

ಆತುಮ ಮೂರುತಿ ಅಂತರಾತುಮ ಮೂರುತಿಯು |

ಬಿಂಬ ಮೂರುತಿ ಜೀವದಾಕಾರ ಮೂರುತಿಯು |

ಅಣುರೇಣುವೆಂಬ ಚಿನ್ಮಯ ಮೂರತಿಯು |

ಮುನಿಗಳ ಹೃದಯದೊಳು ಮಿನುಗುವ ಮೂರುತಿಯು |

ಬೊಮ್ಮಗಾದಾ ಮೂರುತಿಯು ತಾನೆಲ್ಲಿಂದೆಲ್ಲಿ ಬಂದಿತು |

ಅಮರರಾಭರಣ ತಾನೆಲ್ಲಿಂದೆಲ್ಲಿಗೊದಗಿತೊ |

ಎನಗೆ ಪ್ರಸನ್ನನಾದ ಉಡುಪಿಯ ಕೃಷ್ಣ ಮೂರುತಿ |

ಪುರಂದರವಿಠಲನ ಒಲುಮೆಯೆಂತೊ | 1

ಮಟ್ಟತಾಳ

ಮಂದಾರಮಲ್ಲಿಗೆ ತುರುಬಲಿ ದಿವ್ಯಾಂಬರವನ್ನುಟ್ಟು ಗೋ-|

ವಿಂದನಾಡಿದಾಟಗಳನು ಪ್ರಬಂಧಗೀತಗಳ ಮಾಡಿ |

ಚೆಂದ ಚೆಂದದಲಿ ಪಾಡಿದಳು ಮೊಸರ ಮಥನದಲಿ ತನ್ನ |

ಕಂದನ ಅದ್ವಿತೀಯ ಅಪ್ರಮೇಯಾಗಮ್ಯ ಗೋಚರನೆಂದು |

ನಂದವ್ರಜವೆತ್ತ ಉಡುಪಿಯ ಕೃಷ್ಣನ ಮಹಿಮೆ ಯೆತ್ತಲೆಂದು |

ವೃಂದಾರಕವಂದ್ಯ ಪುರಂದರವಿಠಲನೆ ಬಲ್ಲನೆನುತಿರೆ 2

ತ್ರಿವಡೆ ತಾಳ

ಪೊಂಬಟ್ಟೆ ಪಾಲ್ಮೊಸರಿಂದಲಿ ತೋದಿದೆ |

ಕಂಬು ಕಂಧರ ಕೆನೆ-ಬೆಣ್ಣೆಯ ಲೊರೆದಿದೆ |

ಅಂಬುಜನಾಭ ನೀ ಎಲ್ಲೆಲ್ಲಿ ತುಡುತಿಂದೆ |

ಎಂಬ ಗೋಪಿಗೆ ಕೃಷ್ಣ ಅಂಜುತಿದ್ದುದ ಕಂಡೆ |

ಅಂಬುಜ ಭವ ಪಿತ ಈ ಉಡುಪಿಯ ಕೃಷ್ಣ |

ತಾಂ ಬಾಲಕನಾದ ಪುರಂದರವಿಠಲ 3

ಅಟತಾಳ

ದೇವತರುವು ನಮ್ಮ ದೇವ ಕೊಳಲನೂದೆ |

ದೇವನಾರಿಯರುಟ್ಟ ದೇವಾಂಗದುಗುಲವ |

ಆವ ಸುಸ್ವರವೊ ಆವ ಸುಜಾತಿಯೊ |

ಆವ ಮೂಚ್ರ್ಛನವೊ ಆವ ಸುನಾದವೊ |

ದೇವ ಪುರಂದರವಿಠಲನಂಘ್ರಿಗಳಾಣೆ |

ಈ ಉಡುಪಿಯ ಕೃಷ್ಣನಾದಿ ಮೂರುತಿ ತಪ್ಪಾ 4

ಆದಿತಾಳ

ಒಂದು ಕೈಯಲಿ ಕಡೆಗೋಲು ಮ |

ತ್ತೊಂದು ಕೈಯಲಿ ಕಡೆವ ನೇಣು |

ನಿಂದು ತಾಯ ಮೊಗವಾ ನೋಡಿ |

ಕಂದನ ಕಂದ ನಲಿದಾಡುತ ಧಿಂ ಧಿಂ ಧಿಂ |

ಧಿಂ ಧಿತ ಮುದ್ದು ಪುರಂದರವಿಠಲ |

ಉಡುಪಿಯ ಕೃಷ್ಣ 5

ಜತೆ

ಉಡುಪಿಯ ಸಿರಿ ಕೃಷ್ಣ ಪುರಂದರವಿಠಲ |

ಬಿಡೆನೊ ಬಿಡೆನೊ ನಿನ್ನ ಚರಣಕಮಲವ ||