ನಿಂದೆಯಾಡಲುಬೇಡ ನೀಚಾತ್ಮ nindeyadalubeda neechatma

ನಿಂದೆಯಾಡಲುಬೇಡ ನೀಚಾತ್ಮ - ನಿನ

ಗೆಂದೆಂದು ದೊರಕನು ಪರಮಾತ್ಮ ಪ.

ನರಜನ್ಮಕೆ ಬಂದು ನೀ ನಿಂತಿ - ಪರಿ

ಪರಿ ಮಾಡಿದೆಯೊ ಪರದ ಚಿಂತಿ

ಗರುವದಿಂದ ಹಲ್ಲುತಿಂತಿ - ಇದು

ಸ್ಥಿರವಲ್ಲ ಮೂರುದಿನದ ಸಂತಿ 1

ಪರಸತಿಯರ ಕಂಡು ಹೋಗಿ - ಅಲ್ಲಿ

ಪರಮಾತ್ಮನ ಧ್ಯಾನವನ್ನು ನೀ ನೀಗಿ

ಪರಲೋಕ ಹೇಗೆ ಕಾಣುವೆ ಕಾಗಿ - ನೀನು

ಪರಪರಿಯಲಿ ನೋಡಲೊ ಗೂಗಿ 2

ಬಾಳಿಗೆ ಒಂದೇ ಫಲವು ನೋಡು - ಅಲ್ಲಿ

ಕಳ್ಳಸುಳ್ಳರಿಗೆ ಬಲು ತೋಡು

ಬಾಳ್ವೆವಂತರ ಹುಡುಕಾಡು - ಶ್ರೀ

ಲೋಲ ಪುರಂದರವಿಠಲನೊಳಾಡು 3