ನಾಲಗೆ ನಾಲಗೆ ನಾಲಗೆ naalage naalage naalage

ನಾಲಗೆ ನಾಲಗೆ ನಾಲಗೆ - ಸಿರಿ - |

ಲೋಲನ ನೆನೆ ಕಾಣೊ ನಾಲಗೆ ಪ.

ವಾಸುದೇವನ ನಾಮ ನಾಲಗೆ - ನೀ

ಲೇಸಾಗಿ ನೆನೆ ಕಾಣೊ ನಾಲಗೆ ||

ಆಸೆಯೊಳಗೆ ಬಿದ್ದು ಮೋಸ ಹೋಗಲು ಬೇಡ |

ಕೇಶವನ ನಾಮವ ನೆನೆ ಕಾಣೊ ಮರುಳೆ 1

ಮಾತನಾಡುವಲ್ಲಿ ನಾಲಗೆ - ನೀ ಅ - |

ನೀತಿ ನುಡಿಯದಿರು ನಾಲಗೆ ||

ಆತನ ನಾಮವ ಗೀತದಿ ಪಾಡುತ |

ಸೀತಾಪತಿ ರಘುನಾಥನ ನೆನೆ ಕಾಣೊ 2

ಅಚ್ಯುತನಾಮವ ನಾಲಗೆ ನೀ - |

ಬಿಚ್ಚಿಟ್ಟ ನೆನೆ ಕಾಣೊ ನಾಲಗೆ ||

ನೆಚ್ಚಿ ಕೆಡಲಿ ಬೇಡ ನಿಚ್ಚ ಶರೀರವ |

ಅಚ್ಯುತನಾಮವ ನೆನೆ ಕಾಣೊ ಮರುಳೆ 3

ನನ್ನದು ತನ್ನದು ನಾಲಗೆ - ನೀ- |

ನೆನ್ನದಲಿರು ಕಾಣೊ ನಾಲಗೆ |

ಇನ್ನು ಮೂರು ದಿನದೀ ಸಂಸಾರದಿ |

ಪನ್ನಗಶಯನನ ನೆನೆ ಕಾಣೊ ಮರುಳೆ 4

ಅನುದಿನ ಹರಿನಾಮ ನಾಲಗೆ - ನೀ |

ನೆನೆಯುತಿರು ಕಾಣೊ ನಾಲಗೆ ||

ಘನಮಹಿಮ ನಮ್ಮ ಪುರಂದರವಿಠಲನ |

ಕ್ಷಣ ಕ್ಷಣಕೊಮ್ಮೆ ನೆನೆ ಕಾಣೊ ಮರುಳೆ 5