ಎತ್ತಿಕೊಳ್ಳೆ ಗೋಪೀ ರಂಗನ

ಎತ್ತಿಕೊಳ್ಳೆ ಗೋಪೀ ರಂಗನ |

ರಚ್ಚೆ ಮಾಧವರಾಯ ನಿಲುವನಲ್ಲ ||ಪ||

ಕರ್ಣದ ಮಾಗಾಯಿ ಕದಪಲಿ ಹೊಳೆಯುತ |

ಎಣ್ಣೆಮಣಿಯ ಕೊರಳಲಿ ಹುಲಿಯುಗುರು ||

ಚಿನ್ನದ ಬಾಯೊಳು ಅಮೃತವ ಸುರಿಯುತ್ತ |

ಬೆಣ್ಣೆ-ಹಾಲನುಂಬುವೆನೆಂದು ಬಂದ 1

ಅಂಬೆಗಾಲಿಕ್ಕುತ ತುಂಬಿಯೊಲ್ ಮೊರೆಯುತ—|

[ಚೆಂದದ] ಅರಳೆಲೆ ನಲಿದಾಡುತ ||

ಬಂದು ಸರಳನಂದದಿ ಬಾಯ ಬಿಡುತ ಮು—|

ಕುಂದನು ಮೊಲೆಯನುಂಬುವೆನೆಂದು ಬಂದ 2

ಬಿಗಿದ ಪಟ್ಟೆಯಲಿ ಬಾಯ್‍ತಲೆಯು ಹೊಳೆಯುತಿರೆ |

ಚಿಗುಟುತ ಎಡದ ಕೈಯಲಿ ಕುಚವ ||

ನಗುತ ನಾಚುತ ಗೋಪಿಯ ಮುಖ ನೋಡುತ |

ಮಿಗೆ ನಲಿನಲಿದುಂಡ ಪುರಂದರವಿಠಲ 3