ನೀನೊಲಿದರೇನಾಹುದು - ಶ್ರೀಹರಿಯೆ neenolidarenahudo shri hariya

ನೀನೊಲಿದರೇನಾಹುದು - ಶ್ರೀಹರಿಯೆ - |

ಮುನಿಯೆ ನೀನೆಂತಾಹುದು ಪ

ವಾಲಿ ಬಲ್ಲಿದ ವಾನರರಿಗೆ - ಶ್ರೀಹರಿಯೆ

ನೀ ಮುನಿದು ಎಚ್ಚವನ ಕೊಂದೆ |

ಮೇಲೆ ಕಿಷ್ಕಿಂಧೆಯ ಪುರದ ಸುಗ್ರೀವನ

ವಾಲಿಯ ಪದದಲ್ಲಿಟ್ಟೆ 1

ಮೂರು ಲೋಕವನಾಳುವ - ರಾವಣನ

ಊರ ಬೂದಿಯ ಮಾಡಿದೆ |

ವಾರಿಧಿಯ ಒಳಗಿಪ್ಪ ಲಂಕೆಯ ವಿಭೀಷಣಗೆ

ಸ್ಥಿರಪಟ್ಟವನು ಕಟ್ಟಿದೆ 2

ಪನ್ನಗವನುದ್ಧರಿಸಿದೆ - ಕೌರವರ -

ಹನ್ನೊಂದಕ್ಷೋಣಿ ಬಲವ |

ಛಿನ್ನಛಿದ್ರವ ಮಾಡಿ ಅವರನ್ನು ಮಡುಹಿದೆ

ಪಾಂಡವರ ಪದವಿಯಲಿಟ್ಟೆ 3

ಹಿರಣ್ಯಕನು ಸುತನ ಕೊಲಲು - ಆಗ ನೀ

ಕರುಣದಿಂದೋಡಿ ಬಂದೆ |

ಮರಣವೈದಿಸಿ ಪಿತನ ತರಳ ಪ್ರಹ್ಲಾದನನು

ಶರಣರೊಳು ಸರಿಮಾಡಿದೆ 4

ಭಾಷೆ ಪಾಲಿಪನೆನುತಲಿ - ನಾ ಬಹಳ

ಆಸೆ ಮಾಡುತಲಿ ಬಂದೆ |

ಶೇಷಗಿರಿವಾಸ ಪುರಂದರವಿಠಲ ದಾರಿದ್ರ್ಯ

ನಾಶಮಾಡೆನ್ನ ಸಲಹೊ5