ನೀನೇ ಅಚ್ಚುತ ನೀನೇ ಮಾಧವ neene achyuta neene madhava

ನೀನೇ ಅಚ್ಚುತ ನೀನೇ ಮಾಧವ |

ಹರಿಗೋವಿಂದನು ನೀನೆ ||

ನೀನೆಗತಿಯೆಂದು ನಂಬಿದ ದಾಸಗೆ |

ಅಭಯ ಕೊಟ್ಟಾತನು ನೀನೆ ಪ

ಜಲದೊಳು ಪೊಕ್ಕು ಮೈನಡುಗಿಸಿ ಭಾರವ |

ತಳೆದಾತನು ನೀನೆ ||

ಇಳೆಯ ಕದ್ದ ಸುರನ ದಾಡೆಯಿಂದ ಸೀಳಿ ಕಂಬ |

ದೊಳು ಉದ್ಭವಿಸಿದೆ ನೀನೆ 1

ಬಲಿಯ ಪಾತಾಳಕೆ ತುಳಿದೆಯೊ ನೀನು ಕೊ-|

ಡಲಿಯ ಪಿಡಿದವನು ನೀನೆ ||

ಜಲಧಿಯ ದಾಟಿ-ಅಸುರರ ಕಡಿದು |

ಲಲನೆಯ ತಂದಾತ ನೀನೆ 2

ಗೊಲ್ಲರ ಮನೆಯಲಿ ಬೆಣ್ಣೆಯ ಕದ್ದು |

ಕಳ್ಳನೆನಿಸಿದವ ನೀನೆ ||

ಬಲ್ಲಿದ ತ್ರಿಪುರದಿ ಬತ್ತಲೆ ನಿಂತು |

ಒಳ್ಳೆ ಹಯವ ಹತ್ತಿದೆ ನೀನೆ 3

ಪಾಂಡವರಿಗತಿ ಪ್ರಿಯನೆಂದೆನಿಸಿದ |

ಪುಂಡರೀಕಾಕ್ಷನು ನೀನೆ |

ಪುಂಡಲೀಕ ಪುರುಷೋತ್ತಮ ಮೂರುತಿ |

ಪುರಂದರವಿಠಲನು ನೀನೆ 4