ನಮ್ಮಪ್ಪ ಸುಮ್ಮಗಿರೊ ಗೋಪಾಲಾ nammappa summagiro gopala

ನಮ್ಮಪ್ಪ ಸುಮ್ಮಗಿರೊ ಗೋಪಾಲಾ-|

ಗುಮ್ಮನು ಎಳೆದೊಯ್ವನು ಪ

ಎಡದ ಕೈಯಲಿ ಕಪಾಲ-ಗೋಪಾಲಾ-|

ಬಲದ ಕೈಯಲಿ ತ್ರಿಶೂಲ ||

ಚಳಿಬೆಟ್ಟದ ಹೆಣ್ಣ ಮೈಯೊಳಿಟ್ಟವನಂತೆ |

ಅಲೆದು ಸ್ಮಶಾನವ ತಿರುಗುವನಂತೆ 1

ಮೂರು ಕಣ್ಣಿನವನೊ-ಗೋಪಾಲಾ-|

ಐದು ತಲೆಗಳವನೊ ||

ದಾರಿಯ ಪೋಗುವ ನಾರಿಯನೆಳತಂದು |

ಸೇರಿಸಿ ಶಿರದಲ್ಲಿ ಹೊತ್ತನೊ 2

ಚಂದ್ರನರ್ಧವ ಪಿಡಿದು-ತಲೆಯ ಮೇಲೆ-

ಚೆಂದಕಿಟ್ಟಿರುವನಂತೆ ||

ಅಂದಗಾರನಂತೆ [ಅನಲನೇತ್ರನಂತೆ] |

ಮುಂದಿಪ್ಪ ಹುಡುಗನ ಕೊಂದು ತಿಂದವನಂತೆ 3

ನಿನ್ನ ಮಗನ ಮಗನೊ-ಗೋಪಾಲಾ-|

ಪನ್ನಗ ಭೂಷಣನೋ ||

ಧನ್ಯನಾಗಿ ಶ್ರೀರಾಮ ನಾಮವನು |

ಚೆನ್ನಾಗಿ ಚಿಂತಿಪನೊ 4

ಕರಿಯಜಿನ ಪೊತ್ತವನೊ ಗೋಪಾಲಾ-|

ನೆರೆದ ಭೂತ ತಂದವನೊ ||

ಶರಧಿ ಶಯನ ನಿನ್ನ ಚರಣ ಪಂಕಜ ಭೃಂಗ |

ಪುರಂದರವಿಠಲ ಪನ್ನಂಗ ಶಯನನೆ 5