ಕಡುಕೃಪೆಯಿಂದ ಹರಿ ಒಲದರೆ ಸತ್ಯದ

ಕಡುಕೃಪೆಯಿಂದ ಹರಿ ಒಲದರೆ ಸತ್ಯದ

ನಡೆವಳಿ ಮೌನವೆ ಸಾಕ್ಷಿ

ದೃಡ ಭಕ್ತರಿಗುಣಬಡಿಸಿದಂಥವರಿಗೆ

ಷಡುರ ಸ್ನಾನವೇ ಸಾಕ್ಷಿ ಪ

ಅನ್ನದಾನ ಮಾಡಿದ ಮನುಜಗೆ - ದಿ

ವ್ಯಾನ್ನವುಂಬುವುದೇ ಸಾಕ್ಷಿ

ಅನ್ನದಾನ ಮಾಡದ ಮನುಜಗೆ - ಸರ

ರನ್ನಕೆ ಬಾಯ್ಬಿಡುವುದೆ ಸಾಕ್ಷಿ 1

ಕನ್ಯಾದಾನ ಮಾಡದ ಮನುಜಗೆ ಚೆಲ್ವ

ಹೆಣ್ಣಿನ ಭೋಗವೇ ಸಾಕ್ಷಿ

ಕನ್ಯಾದಾನ ಮಾಡದ ಮನುಜಗೆ - ಪರ

ಹೆಣ್ಣಿನ ಹೋರಾಟವೇ ಸಾಕ್ಷಿ 2

ಪರರಿಗೊಂದು ತಾನೊಂದುಂಬುವರಿಗೆ

ಜ್ವರ - ಗುಲ್ಮ ರೋಗವೇ ಸಾಕ್ಷಿ

ಪರಿಪರಿ ವಿಧದಿಂದ ಹಿರಿಯರ ದೂರುವಗೆ

ತಿರಿದು ತಿಂಬುವುದೇ ಸಾಕ್ಷಿ 3

ಕಂಡ ಪುರುಷಗೆ ಕಣ್ಣಿಡುವ ಸತಿಯು - ತನ್ನ

ಗಂಡನ ಕಳೆಯುದೇ ಸಾಕ್ಷಿ

ಪುಂಡತನದಿ ಪರ ಹೆಂಗಳೆನುಳುಪುವಗೆ

ಹೆಂಡಿರು ಕಳೆವುದೇ ಸಾಕ್ಷಿ 4

ಕ್ಷೇತ್ರದಾನದ ಮಾಡಿದ ಮನುಜಗೆ - ಏಕ

ಛತ್ರದ ರಾಜ್ಯವೇ ಸಾಕ್ಷಿ

ಮುಕ್ತಿ ಪಡೆದು ತಿಳಿ ಪುರಂದರವಿಠಲನ

ಭಕ್ತನಾಗುವುದೇ ಸಾಕ್ಷಿ 5