ಏಕಾರತಿಯನೆತ್ತುವ ಬನ್ನಿ ನಮ್ಮ

ಏಕಾರತಿಯನೆತ್ತುವ ಬನ್ನಿ ನಮ್ಮ

ಲೋಕನಾಥನ ಸಿರಿ ಪಾದವ ಬೆಳಗುವ ಪ.

ತುಪ್ಪದೊಳ್ಬೆರಸಿದ ಮೂರು ಬತ್ತಿಯನಿಟ್ಟು

ಒಪ್ಪುವ ದೀಪಕ್ಕೆ ದೀಪ ಹಚ್ಚಿ ||

ತಪ್ಪದೆ ಸಕಲ ಪಾಪಂಗಳ ಹರಿಸುವ

ಅಪ್ಪ ವಿಠಲನ ಪದಾಬ್ಜವ ಬೆಳಗುವ 1

ಹರುಷದಿ ಏಕಾರತಿ ಬೆಳಗಿದ ಫಲ

ನರಕದಿಂದುದ್ಧಾರ ಮಾಡುವುದು ||

ಪರಮ ಭಕುತಿಯಿಂದ ಬೆಳಗುವ ನರರನು

ಹರಿ ತನ್ನ ಹೃದಯದಿ ಧರಿಸುವನಯ್ಯ 2

ಅನ್ಯ ಚಿಂತೆ ಮಾಡದೆ ಅನ್ಯರ ಭಜಿಸದೆ ಮ

ತ್ತನ್ಯ ದೇವರನು ಸ್ಮರಿಸದೆ ಅ ||

ನನ್ಯವಾಗಿ ಶ್ರೀ ಪುರಂದರವಿಠಲನ

ಪುಣ್ಯನಾಮಗಳ ಧ್ಯಾನಿಸುತ 3