ದಾಸರ ನಿಂದಿಸಬೇಡಲೊ ಪ್ರಾಣಿ raastra nindisabedalo praani

ದಾಸರ ನಿಂದಿಸಬೇಡಲೊ ಪ್ರಾಣಿ - ಹರಿ ದಾಸರ ನಿಂದಿಸಬೇಡ ಪ.

ಮೋಸವಾಯಿತೊ ಮನದೊಳು ಗಾಢ | ಲೇಸಾಗಿ ಇದ ತಿಳಕೊ ಮೂಢ ಅಪ

ರಾಮನ ನಿಂದಿಸಿ ರಾವಣ ಕೆಟ್ಟ | ತಮ್ಮಗಾಯಿತು ಸ್ಥಿರಪಟ್ಟ ||

ತಾಮಸದಿಂದಲಿ ಕೌರವ ಕೆಟ್ಟ | ಧರ್ಮಗೆ ರಾಜ್ಯವ ಬಿಟ್ಟ 1

ಮನದೊಳಗಿನ ವಿಷಯದ ವಿಷ ಬಿಟ್ಟು | ಅನುದಿನ ಹರಿಯ ನೆನೆಯಿರಣ್ಣ ||

ಸನಕಾದಿವಂದ್ಯನ ಪೂಜಿಸಿದರೆ ನೀವ್ | ಘನ ಪದವಿಯ ಕಾಣುವಿರಣ್ಣ 2

ಕನಕದಾಸನು ಕಬ್ಬಲಿಗನು ಎಂದು | ಅಣಕಿಸಿ ನುಡಿಬೇಡಿರಣ್ಣ |

ಜನರಂತೆ ನರನಲ್ಲ ತುಂಬುರನೀತನು | ಜನಕಜೆರಮಣನ ಪಾದಸೇವಕನು 3

ಉಡಿಯ ಒಳಗೆ ಕಿಡಿ ಬಿದ್ದರೆ ಅದು ತಾ | ಸುಡದನಕಾ ಬಿಡದಣ್ಣ ||

ಬಡವನಾಗಿ ಕೆಡುಬುದ್ದಿಯ ಬಿಟ್ಟು | ನಡೆಯ ಕಂಡು ಪಡೆದುಕೊಳ್ಳಣ್ಣ 4

ದೇವಕಿ ಸೆರೆಯನು ಬಿಡಿಸಿದ ದೇವನ | ಸೇವಕರು ನರರೆ ನಿಮಗವರು ||

ಭಾವಜನಯ್ಯನ ಪದವ ನೆನೆದರೆ | ಪಾವನ ಮಾಡುವ ಪುರಂದರವಿಠಲ 5