ಗೋವರ್ಧನ ಗಿರಿಯನೆತ್ತಿದ ಗೊವಿಂದ govardhana giriyannettida govinda

ಗೋವಿಂದ ನಮೋ ಗೋವಿಂದ ನಮೋ ಗೋವಿಂದ ನಾರಾಯಣ

ಗೋವರ್ಧನ ಗಿರಿಯನೆತ್ತಿದ ಗೊವಿಂದ ನಮ್ಮ ರಕ್ಷಿಸೈ

ಮಂಚ ಬಾರದು ಮಡದಿ ಬಾರಳು

ಕಂಚುಕನ್ನಡಿ ಬಾರವು

ಸಂಚಿತಾರ್ಥದ ದ್ರವ್ಯ ಬಾರದು

ಮುಂಚೆ ಮಾಡಿರೊ ಧರ್ಮವ

ಅರ್ಥವ್ಯಾರಿಗೆ ಪುತ್ರರ್ಯಾರಿಗೆ

ಮಿತ್ರ ಬಾಂಧವರ್ಯಾರಿಗೆ

ಕರ್ತೃ ಯಮನವರೆಳೆದು ಒಯ್ದಾಗ

ಅರ್ಥಪುತ್ರರು ಕಾಯ್ವರೆ

ತಂದು ಬಂದರೆ ತನ್ನ ಪುರುಷನ

ಬಂದಿರಾ ಬಳಲಿದಿರಾ ಎಂಬಳು

ಒಂದು ದಿವಸ ತಾರದಿದ್ದರೆ

ಹಂದಿನಾಯಂತೆ ಬೊಗಳ್ವಳು

ಪ್ರಾಣವಲ್ಲಭೆ ತನ್ನ ಪುರುಷನ

ಕಾಣದೆ ನಿಲ್ಲಲಾರಳು

ಪ್ರಾಣಹೋಗುವ ಸಮಯದಲ್ಲಿ

ಜಾಣೆ ಕರೆದರೆ ಬಾರಳು

ಉಂಟು ಕಾಲಕೆ ನಂಟರಿಷ್ಟರು

ಬಂಟರಾಗಿ ಕಾಯ್ದರು

ಕಂಟಕ ಯಮನವರು ಎಳೆವಾಗ

ನಂಟರಿಷ್ಟರು ಬಾರರು

ಒಡವೆ ಅರಸಿಗೆ ಒಡಲು ಅಗ್ನಿಗೆ

ಮಡದಿ ಮತ್ತೊಬ್ಬ ಚೆಲುವಗೆ

ಬಡಿದು ಹೊಡೆದು ಯಮನವರೆಳೆವಾಗ

ಎಡವಿ ಬಿದ್ದಿತು ನಾಲಗೆ

ದಿಟ್ಟತನದಲಿ ಪಟ್ಟವಾಳುವ

ಕೃಷ್ಣರಾಯನ ಚರಣವ

ಮುಟ್ಟಿ ಭಜಿಸಿರೊ ಸಿರಿ ಪುರಂದರ

ವಿಟ್ಠಲೇಶನ ಚರಣವ