ಮನಸು ನಿನ್ನ ಮೇಲೆ manasu ninna mele

ಮನಸು ನಿನ್ನ ಮೇಲೆ ಬಹಳ-ಕಾಲ |

ಅನುಕೂಲಿಸದೊ ಗೋಪಾಲ ಪ

ನಿನ ಕೂಡೆ ಈಗ ಕೂಡುವೆನೆಂದರೆ ಮನೆ-|

ಜನರೆಲ್ಲರು ಕೂಡಲೀಸರೊ ಕೃಷ್ಣ ಅ.ಪ

ಗಂಡನೆಂಬವನು ಉದ್ದಂಡ-ಎನ್ನ |

ಕಂಡರೆ ಸೇರನು ಭಾವ ಪ್ರಚಂಡ ||

ಭಂಡೆ ಅತ್ತೆಯು ಲಂಡೆ ಅತ್ತಿಗೆ ಕೇಳೊ |

ಕಂಡರಿಬ್ಬರನು ದಂಡಿಸುವರೊ ರಂಗ 1

ನೆರೆಹೊರೆಯವರೆನ್ನನೆಲ್ಲ-ಮೈಯ |

ನೆರಳ ಕಂಡರೆ ಸೇರರಲ್ಲ ||

ಸರಿಸಖಿಯರು ಎಲ್ಲ ಸುಮ್ಮನಿರುವರಲ್ಲ |

ಮರೆಮಾತನಾಡಲು ವೇಳೆ ಕೂಡದೊ ರಂಗ 2

ಮದುವೆ ಮಾಡುವರೊ ಮನೆಯೊಳು-ನಾಳೆ |

ಅದರ ಸಂದಣಿಯ ಹೊಂಚಿನೊಳು ||

ಮುದದಿಂದ ಕೂಡುವೆನಾವ ಪರಿಯೊಳು |

ಮದನ ತಂತ್ರದಿಂದ ಪುರಂದರವಿಠಲ 3