ಮಾರುತನೆ ಏಳೆಂದು maarutane elendu

ಮಾರುತನೆ ಏಳೆಂದು ಎಬ್ಬಿಸಿದಳಂಜನೆಯು

ಶ್ರೀ ರಾಮ ಸೇವೆಗೆ ತಡವಾಯಿತೇಳು ಪ.

ಸೇತುಗಟ್ಟಲು ಬೇಕು ಶರಧಿ ದಾಟಲು ಬೇಕು

ಮಾತೆಗೆ ಉಂಗುರವ ಕೊಡಲು ಬೇಕು ||

ಪಾತಕಿ ರಾವಣನ ಶಿರವನ್ಹರಿಯಲು ಬೇಕು

ಸೀತೆಪತಿ ರಾಮರಿಗೆ ನಮಿಸಬೇಕು 1

ಇಂತು ಕಳಿಯಲು ಬೇಕು ಅಙÁ್ಞತವಾಸವನು

ಪಂಥದಲಿ ಕೀಚಕರ ಒದೆಯಬೇಕು ||

ತಂತ್ರದಲಿ ಗೆಲಬೇಕು ಶಕುನಿ ದುರ್ಯೋಧನರ

ಕುಂತಿನಂದನನೆಂದು ಹೆಸರಾಗಬೇಕು 2

ಮಧ್ವರಾಯರು ಎಂದು ಪ್ರಸಿದ್ಧರಾಗಲು ಬೇಕು

ತಿದ್ದಿ ಹಾಕಲು ಬೇಕು ಸಕಲಗ್ರಂಥಗಳ ||

ಅದ್ವೈತವಾದಿಗಳ ಗೆದ್ದು ಕೆಡಹಲು ಬೇಕು

ಮುದ್ದು ಪುರಂದರವಿಠಲ ದಾಸನೆನಿಸಲು ಬೇಕು 3