ವೃಂದಾವನದೇವಿ ನಮೋ ನಮೋ vrundavanadevi namo namo

ವೃಂದಾವನದೇವಿ ನಮೋ ನಮೋ, ಚೆಲ್ವ

ಮಂದರಧರನ ಮನಃಪ್ರಿಯಳೆ

ವೃಂದಾವನ ದೇವಿ ನಮೋ ನಮೋ ||ಪ||

ನಿನ್ನ ಸೇವಿಸಿ ಉದಕವನೆರೆಯಲು

ಮುನ್ನ ಮಾಡಿದ ಪಾಪ ಹೋಗುವುದು

ಎನ್ನ ಇಪ್ಪತ್ತೊಂದು ಕುಲದವರಿಗೆಲ್ಲ

ಉನ್ನಂತ ವೈಕುಂಠ ಪದವೀವಳೆ ||

ಒಂದೊಂದು ದಳದಲ್ಲಿ ಒಂದೊಂದು ಮೂರುತಿ

ಸಂದಣಿಸುವೆ ಬಹು ಗುಪಿತದಲಿ

ಬಂದು ಕುಂಕುಮ ಶಂಖಚಕ್ರ ಧರಿಸಿದರೆ

ತಂದೆ ನಾರಾಯಣ ಕರೆದೊಯ್ಯುವ ||

ಹರಿಗೆ ಸಮರ್ಪಿಸಿದ ತುಳಸಿ ನಿರ್ಮಾಲ್ಯವ

ಕೊರಳೊಳು ಧರಿಸಿ ಕರ್ಣದೊಳಿಟ್ಟರೆ

ದುರಿತ ರಾಶಿಗಳೆಲ್ಲ ಅಂಜಿ ಓಡುತಲಿವೆ

ಹರಿಯು ತನ್ನವರೆಂದು ಕೈ ಪಿಡಿವ ||

ಹತ್ತು ಪ್ರದಕ್ಷಿಣೆ ಹತ್ತು ವಂದನೆ ಮಾಡೆ

ಉತ್ತಮ ವೈಕುಂಠ ಪದವೀವಳೆ

ಭಕ್ತಿಯಿಂದಲೆ ಬಂದು ಕೈ ಮುಗಿದವರನ್ನು

ಕರ್ತುನಾರಾಯಣ ಕರೆದೊಯ್ವನು ||

ಆವಾವಪರಿಯಲ್ಲಿ ಸೇವೆಯ ಮಾಡಲು

ಪಾವನ ವೈಕುಂಠಪದವೀವಳೆ

ದೇವ ಶ್ರೀ ಪುರಂದರವಿಠಲರಾಯನ

ದೇವಿ ನಿನ್ನ ಮುಟ್ಟಿ ತ್ರಾಹಿಯೆಂಬೆ ||