ಕಲ್ಯಾಣಂ ತುಳಸಿ ಕಲ್ಯಾಣಂ kalyanam tulasi kalyanam

ಕಲ್ಯಾಣಂ ತುಳಸಿ ಕಲ್ಯಾಣಂ                      ||ಪ||

ಕಲ್ಯಾಣವೇ ನಮ್ಮ ಕೃಷ್ಣ ಶ್ರೀತುಳಸಿಗೆ

ಬಲ್ಲಿದ ಶ್ರೀ ವಾಸುದೇವನಿಗೆ                       ||ಅ.ಪ||

ಅಂಗಳದೊಳಗೆಲ್ಲ ತುಳಸಿಯ ವನಮಾಡಿ

ಶೃಂಗಾರವ ಮಾಡಿ ಶೀಘ್ರದಿಂದ

ಕಂಗಳ ಪಾಪವ ಪರಿಹರಿಸುವ

ಮುದ್ದುರಂಗ ಬಂದಲ್ಲಿ ತಾ ನೆಲೆಸಿದನು          ||೧||

ಮಿಂದು ಮಡಿಯನುಟ್ಟು ಸಂದೇಹವ ಬಿಟ್ಟು

ತಂದ ಶ್ರೀಗಂಧಾಕ್ಷತೆಗಳಿಂದ

ಸಿಂಧುಶಯನನ ವೃಂದಾವನದಿ ಪೂಜಿಸೆ

ಕುಂದದ ಭಾಗ್ಯವ ಕೊಡುತಿಹಳು                 ||೨||

ಭಕ್ಷ್ಯ ಭೋಜ್ಯಂಗಳ ನೈವೇದ್ಯವನಿತ್ತು

ಲಕ್ಷ ಬತ್ತಿಯ ದೀಪವ ಹಚ್ಚಿ

ಅಧೋಕ್ಷಜ ಸಹಿತ ವೃಂದಾವನ ಪೂಜಿಸೆ

ಸಾಕ್ಷಾತ್ ಮೋಕ್ಷವ ಕೊಡುತಿಹಳು              ||೩||

ಉತ್ಥಾನ ದ್ವಾದಶಿ ದಿವಸದಿಂದಲಿ ಕೃಷ್ಣ

ಉತ್ತಮ ತುಳಸಿಗೆ ವಿವಾಹವ

ಚಿತ್ತನಿರ್ಮಲರಾಗಿ ಮಾಡಿದವರಿಗೆ

ಉತ್ತಮ ಗತಿ ಈವ ಪುರಂದರವಿಠಲ