ಉದರವೈರಾಗ್ಯವಿದು udara vairagyavidu

ಉದರವೈರಾಗ್ಯವಿದು - ನಮ್ಮ - |

ಪದುಮನಾಭನಲ್ಲಿ ಲೇಶಭಕುತಿ ಇಲ್ಲ ಪ.

ಉದಯಕಾಲದಲೆದ್ದು ಗಡಗಡ ನಡುಗುತ |

ನದಿಯಲಿ ಮಿಂದೆನೆಂದು ಹಿಗ್ಗುತಲಿ ||

ಮದ ಮತ್ಸರ ಕ್ರೋಧ ಒಳಗೆ ತುಂಬಿಟ್ಟುಕೊಂಡು |

ಬದಿಯಲಿದ್ದವರಿಗಾಶ್ಚರ್ಯದೋರುವುದು 1

ಕರದಲಿ ಜಪಮಣಿ ಬಾಯಲಿ ಮಂತ್ರವು |

ಅರಿವೆಯ ಮುಸುಕನು ಮೋರೆಗೆ ಹಾರೆ ||

ಪರಸತಿಯರ ರೂಪ ಮನದಲಿ ಗುಣಿಸುತ |

ಪರಮವೈರಾಗ್ಯಶಾಲಿಯೆನಿಸುವುದು 2

ಕಂಚುಗಾರನಾ ಬಿಡಾರದಿಂದಲಿ |

ಕಂಚು ಹಿತ್ತಾಳೆಯ ಪ್ರತಿಮೆಯ ನೆರಹಿ ||

ಮಿಂಚಬೇಕೆಂದು ಬಹುಜ್ಯೋತಿಗಳನೆ ಹಚ್ಚಿ

ವಂಚಕತನದಲಿ ಪೂಜೆಯ ಮಾಳ್ಪುದು 3

ಬೂಟಕತನದಲಿ ಬಹಳ ಭಕುತಿ ಮಾಡಿ |

ಸಾಟಿಯಿಲ್ಲವು - ಎನಗೆಂದೆನಿಸಿ ||

ನಾಟಕ ಸ್ತ್ರೀಯಂತೆ ಬಯಲಡಂಬವ ತೋರಿ |

ಊಟಕೆ ಸಾಧನೆ ಮಾಡಿಕೊಂಬುದಿದು 4

ನಾನು ಎಂಬುದ ಬಿಟ್ಟು e್ಞÁನಿಗಳೊಡನಾಡಿ |

ಏನಾದುದು ಹರಿ ಪ್ರೇರಣೆಯೆಂದು |

ಶ್ರೀ ನಿಧಿ ಪುರಂದರವಿಠಲರಾಯನನು |

ಕಾಣದೆ ಮಾಡಿದ ಕಾರ್ಯಗಳೆಲ್ಲ 5